MAIL KUTOKA KWA MDAU

Habari Zamaradi,

Nimefurahishwa na uchambuzi wako na kuonesha ni jinsi gani hujafurahishwa na suala la matumizi ya lugha ya kiingereza katika filamu zetu.Mimi naomba niliongelee suala hili kwa mtazamo wangu.

Nimewahi kukaa na hawa jamaa zangu na kuongea nao juu ya matumizi ya kiingereza lakini kama ulivyo sema, ueledi umekuwa mkubwa sana kwao kiasi kwamba, kuwashauri ni kama kutwanga maji kwenye kinu.Kwanza kabisa, sielewi hii ya kuzipa filamu majina ya kiingereza imetoka wapi, mimi sioni kama kuna maana ya jina liwe la kiingereza alafu filamu inachezwa kwa kiswahili.

Umeongelea wasiwasi wako kwamba hadhira kubwa ya filamu hizi ni kina mama wa nyumbani, watoto n.k, nakubaliana na wewe ila hata kama wangekuwa na ufahamu mkubwa wa lugha hiyo, bado nisingeona maana ya matumizi ya "kiing-kiswa" kwenye hizi filamu zetu. Tuamue moja kama ni kiingereza ama kiswahili.

Umeongelea tafsiri (sub-tittle)ni kitu kizuri, ila nazo zina makosa mno ya lugha ya kiingereza hasa kwenye sarufi (grammar) kiasi kwamba wala auhitaji uelewa mkubwa wa kiingereza kutambua makosa. Mimi nashindwa kuelewa, Tanzania kuna wataalam kibao wa lugha ambao wanaweza kutafsiri kwa kiingereza fasaha. Hii ni moja ya mambo ambayo yanasababisha tasnia ya filamu ionekane kuwa haina watu makini. Ukija kwenye matamshi ndo usiseme si kiingereza tu hata kiswahili chenyewe wakati mwengine unashindwa kuelewa hapa inakuwaje? Lugha ni kitu muhimu mno katika filamu na cha kufanya ni kuonesha kwamba uko makini na kile ukifanyacho.

Kama tunataka filamu zetu zifikie katika kiwango cha kimataifa lazima tuwe makini, unapompelekea mgeni filamu na kukuta makosa kama hayo sidhani kama kazi yako ataichukulia kwa uzito.Kwenye suala la hadithi naona tunacheza hadithi za kufikirika saana. Unajua katika mazingira yetu kuna story ambazo mtu akika chini na kuzipangilia kwa kuweka matukio yenye mvuto, hakika filamu zetu zitakuwa nzuri zaidi ya hapo.

Ukiangalia nyingi ya ya filamu zetu utaona, kikubwa kioneshwacho ni maisha ya hali ya juu mno, kunavitu hapo nyumbani ukivifanyia utafiti utapata hadithi nzuri sana. Nakupa mfano, utakuta mtu akimfumania mpenzi wake anatoa bastola, kitu ambacho kwa kwetu hapo bastola ni kitu adimu kwa sisi wananchi wa kawaida kuona, mara nyingi silaha tusionazo labda upite benki, polisi n.k na kumkuta skari na SMG.

Mwisho jamaa zangu life style wanayo ishi si nzuri kwa mustakabali wa tasnia ya filamu. Haiwezekani haipiti wiki bila kuona skendo kwenye udaku inayo muhusu msanii wa filamu. Unajua kuna maarufu wengi tu Tanzania, lakini wa filamu wamekuwa warahisi mno kiasi kwamba hawana hesma tena.

Angalia jinsi wasanii wa bongo flava wanavyo shirikishwa katika masuala muhimu ya kitaifa, mfano mabalozi wa Malaria, why kusiwe na wengi wa filamu. Hata mimi siwezi kukufanya uwe balozi wangu kama jamii inakuona ni zimbukuku, bongo-lala,fisadi wa mapenzi,na hayawani!

Shule muhimu ndugu zangu, wenzenu tumepitia huo umaarufu vidole hauna maana hata kidogo.

Shukrani.